പോഷകപ്രദമായ ഡയറ്റിൽ അനിവാര്യമാണ് ബ്രോക്കോളി
പോഷകപ്രദമായ ഒരു ഡയറ്റ് ആണ് ആഗ്രഹിക്കുന്നതെങ്കിൽ ബ്രോക്കോളിയെ അവഗണിക്കാൻ പാടില്ല. ശരീരത്തിന് ആവശ്യമുള്ള ഏറെ ഘടകങ്ങൾ അടങ്ങിയിരിക്കുന്ന പച്ചക്കറിയാണ് ബ്രോക്കോളി. ഇരുമ്പിന്റെ കാര്യത്തിലെന്നു മാത്രമല്ല, മറ്റു ധാതുക്കളുടെയും പോഷകങ്ങളുടെയും കാര്യത്തിലും ഏറെ മുന്നിലാണ്. എന്തുകൊണ്ടാണ് ബ്രോക്കോളി ഒരിക്കലും ഒഴിവാക്കരുതെന്ന് പറയുന്നതെന്നു നോക്കാം.
ദഹനത്തെ സഹായിക്കും
ബ്രോക്കോളിയിൽ ഉയർന്ന അളവിലടങ്ങിയിരിക്കുന്ന ഫൈബർ ദഹനത്തിന് ഏറെ സഹായകമാണ്. ഇത് ശരീരത്തിലെ വിഷാംശം ഇല്ലാതാക്കി ശരീരത്തെ ശുദ്ധമാക്കുന്നു. മലശോധന ശരിയാക്കാനും ഇത് നല്ലതാണ്. നാരുകളുടെ കലവറയാണ് ബ്രോക്കോളി. അതിനാൽ, ശരീരഭാരം കുറയ്ക്കുന്നതിനും അമിതമാകാതെ പ്രതിരോധിക്കുന്നതിനും ബ്രോക്കോളി സഹായിക്കും.
ഹൃദയാരോഗ്യം കാക്കും
രക്തത്തിലെ ചീത്ത കൊളസ്‌ട്രോളിനെ അതിവേഗം അലിയിച്ചു കളയാൻ ബ്രോക്കോളിക്ക് സാധിക്കും. ഇതുവഴി ഹൃദയാരോഗ്യം മെച്ചപ്പെടും. ഇതിലുള്ള Thioredoxin എന്നഘടകമാണ് ഹൃദയത്തിന്റെ പേശികളെ സംരക്ഷിക്കാൻ സഹായിക്കുന്നത്. രക്തസമ്മർദം കുറയ്ക്കാനും ബ്രോക്കോളി ഉത്തമം.
ഇതിലടങ്ങിയിരിക്കുന്ന ഗ്ലൂക്കോറഫാനിൻ എന്ന ഘടകമാണ് ചീത്ത കൊളസ്‌ട്രോൾ കുറയ്ക്കാൻ സഹായമാകുന്നത്. ബ്രോക്കോളി അടക്കം ചുരുക്കം ചില പച്ചക്കറികളിൽ മാത്രമാണ് ഒമേഗ3 ഫാറ്റി ആസിഡുകൾ അടങ്ങിയിരിക്കുന്നത്.
വൈറ്റമിൻ കെ, ഫോളിക് ആസിഡ്, വൈറ്റമിൻ സി എന്നിവ ധാരാളം അടങ്ങിയ പച്ചക്കറിയാണ് ബ്രോക്കോളി. രക്തം കട്ടയാകാൻ സഹായിക്കുന്ന പ്രോട്ടീനുകളുടെ മികച്ച പ്രവർത്തനത്തിന് വൈറ്റമിൻ കെ അത്യാവശ്യമാണ്. അതുപോലെ ഇതിലെ ആന്റി ഇന്ഫ്‌ലമേഷൻ ഘടകങ്ങൾ ആത്രൈറ്റിസ് തടയാനും സഹായകമാണ്. ബ്രോക്കോളി സൂപ്പ് അടിക്കടി കുടിക്കുന്നതും ആരോഗ്യം സംരക്ഷിക്കാൻ ഉത്തമമാണ്.